Resensi Serat Kekidungan Winardi

Resensi Serat Kekidungan Winardi

Irah-irahan                   : Serat Kekidungan Winardi

Panganggit                  : Bambang Suwarno, dkk

Kacithak ing                : CV. Cendrawasih

Kitha cithak                 : Surakarta

Tahun terbit                  : 2003

Cacahing kaca             : 114 halaman

Awratipun serat          : 200 gram

Ukuranipun buku        : 16 cm x 21 cm

Warninipun samak      : jene

Isinipun resensi :

            Serat Kekidungan Winardi menika warni samakipun jene. Kertasipun ginakaken kertas buram, ukuranipun 16 x 21 cm kanthi awratipun 200 gram. Serat menika dipun dadosaken buku kanthi ginakaken lem. Sub-babipun wonten 13 dene model nomeripun ngagem romawi, judulipun ngagem huruf kapital, wonten tengah nginggil.

            Bab setunggal (Kidung Purwawedha (Purwaka)), serat menika nyariosaken mujudaken bebuka saking pangimpun, ingkang sinawung ing sekar. Bab kalih (Kidung Mantrawedha (Sarira Hayu) )nyariosaken bab pepujian ing ngarsanipun Gusti Ingkang Mahakuwaos ingkang dipun tindakaken ing wanci dalu. Gusti Ingkang Maha Kuwaos wanci dalu andum sandhang tedha, tuwin ingkang mundhi pepesthen sadaya lelampahaning manungsa, sarta ingkang anggadhahi daya panguwaos samanten agengipun wau. Sakathahing sesakit ingkang badhe dhateng lajeng sami wangsul boten saestu, sakathahing ama ingkang ndadosaken karibedaning lelampahan sami sumingkir tebih, sedaya wau anggadhahi raos welas lan asih. Bab tiga (Kidung Suksmawedha (Hartati)), nyariosaken angewrat kawruh-kawruh utami ngelmi sampurnaning ngagesang. Hartati (artadaya) bebasan saged nguwaosi jagat wetan kilen, tinenggan sumbering gesang. Sinten ingkang saged mangretosi dhateng tepa sarira, prasasat saged sapatemon kaliyan Sang Guru Jati piyambak. Punapa malih salampah-lampahipun taksih jinangkung dening Pangeran, sarta saged kadumugen punapa sasedyanipun, tuwin linulutan ing sasami.menapa ingkang dipun-gayuh saged kadumugen. Tiyang ingkang tumindakipun kanthi landhesan raosing kamanungsan, menika ngakunipun saged wilujeng. Bab sekawan (Kidung Darmawedha (Wingit Wangsit)), nyariosaken angewrat bab kuwajiban-kuwajibaning ngagesang wonten ing alam donya, utaminipun bab puja semeddi. Raos, inggih menika tiyang ngupados ngelmi kedah sampun pawitan saged angraos-raosaken kawruh. Dumununging napsu wonten ing badan sakojur. Upami kapethuk jim peri prayangan, inggih sami rumaos ajrih piyambak, menapa malih sakathahing drubiksa sami mendhak piyambak utawi rumaos welas, dados malah rumeksa sarinten dalunipun. Bab gangsal (Kidung Japawedha (Jatimulya)), angewrat pitedah bab salat daim ing wanci tengah dalu, ingkang mahanani tumrap kamulyaning lair lan batos. Wonten puji ingkang katindakaken ing wanci dalu. Tumindak alat daim. Kajawi kaparingan daya saking panguwaosipun Sang Guru Jati, Malaekat Jabarail ugi animbangi paring daya. Tumrap ingkang anggadhahi ngelmi, sanadyan boten kaesthi, ugi sampun anggadhahi daya, tawa sakaliring upas, racun, bruwang, sedaya sami sirna wisanipun. Bab enem (Kidung Jiwawedha (Mar Marti)), inggih menika kekidungan ingkang tumrap dhateng sadherek kita piyambak ingkang hamomong gesang kita, inggih menika ingkang saged ngawontenaken ing sacipta kita. Wonten puji tumrap dhateng sadherek kita piyambak, menggah kewajibanipun amomong dhateng gesang kita, inggih menika ingkang saged ngawontenaken ing sacipta kita. Bab pitu (Kidung Raksawedha (Pujian Padhanyangan)), angewrat cacahing dhanyang ing Nusa Jawi, kadang catur ing keblat sekawan, saha para dhanyang pangreksaning Praja Surakarta. Bab wolu ( Kidung Yogawedha (Sontreng)), angewrat pangela-ela tumrap lare mbeka (nangis). Bab sanga (Kidung Warawedha (Sesinggah)), inggih menika kekidungan kangge nyinggahaken durgakala sabangsanipun, ingkang asring ngarencana dhateng kita. Bab sedasa (Kidung Setyawedha (Sipat Iman)), angewrat pitedah bilih kita kedah pitados dhateng Gusti Allah ingkang nitahaken, malaekat, kitab-kitab suci, saha para nabi utawi utusanipun. Bab sewelas (Kidung Ajiwedha (Wringin Sungsang)), angewrat kawruh pigunanipun salat daim, ingkang saged ndayani sampurnaning ngagesang. Bab kalih welas (Kidung Saktiwedha (Bale Anyar)), angewrat tata cara lampahing saresmi murih saged nurunaken wiji ingkang sae, migunani tumrap bebrayan agung. Bab tiga welas (Kidung Purnawedha (Panutup)), angewrat pitedah bilih sedaya kidung ingkang sampun kaaturaken kala wau mujudaken ngelmi ingkang migunani tumrap gesang kita wonten ing alam donya.

Serat menika reginipun 25.000 (selangkung) rupiyah. Saged dipun pundhut wonten toko buku Shopping Book Taman Siswa kitha Yogyakarta, toko buku etanipun alun-alun ler, lsp.

Kaluwihanipun serat menika dipun jangkepaken kaliyan teges per wanda, dados menawi dereng paham seratipun saged maos tegesipun. Kekiraganipun serat menika ginakaken basa jawi ingkang inggil, dados kagem pemula utawi tiyang ingkang nembe gladhen basa Jawi menika susah anggenipun mangertosi. Wonten 4 bab ingkang boten wonten tegesipun. Layangipun ugi ginakaken layang buram.

Saran kagem serat menika, langkung sae menawi dipun jangkepi kaliyan glossarium  supados tiyang ingkang maos saged nambah kosakata basa Jawinipun. Layangipun langkung sae ginakaken hvs utawi sanesipun ingkang radi sae supados para maos radi cetha anggenipun maos menapa malih nalika ingkang maos menika tiyang sepuh. Ugi reginipun menika menawi saged radi dipun mirahaken kemawon. 4 bab ingkang dereng wonten tegesipun saged dipun jangkepaken rumiyin.