Ngundhuh Mantu

Ngundhuh Mantu

Sasampunipun ngawontenaken upacara mantenan wonten ing griyanipun temanten putri, ing adat Jawa ugi wonten upacara Ngundhuh Mantu. Mbok bilih upacara menika boten kewajiban, ananging taksih wonten ingkang ngawontenaken saha boten ngawontenaken upacara menika. Upacara Ngundhuh Mantu dipun laksanaaken dening tiyang sepuhipun temanten kakung wonten ing griyanipun kanthi ngrawuhaken kekalih temanten lan keluwarga temanten putri. Biasanipun adicara menika dipun laksanaaken gangsal (5) dinten sasampunipun adicara mantenan. Ananging sakmenika biasanipun 7 (pitu) dinten sasampunipun adicara mantenan. Amargi tiyang sakmenika padosipun dinten ingkang prei utawi tanggal abang.

Ngundhuh mantu menika tegesipun mboyong temanten putri. Adicara menika dipun laksanakaken kanthi cara ngulemi tiyang sepuhipun temanten putri kagem ngalaksanaaken upacara pasrahan lare putrinipun dhateng pihak keluwarga temanten kakung.

Wonten ing adat Jawi menika para putri ingkang sampun mantenan biasanipun badhe dipun boyong dening temanten kakung, saklajengipun omah-omah wonten dalemipun temanten kakung. Amargi temanten kakung menika kagungan kewajiban wigati inggih menika dados pangayom, pelindung, ugi nyaosi nafkah lahir batin kagem garwa lan lare-larenipun.

Upacara ngundhuh mantu biasanipun dipun laksanaaken kanthi sederhana menawi dipun bandingaken kaliyan upacara mantenan ingkang dipun selenggaraaken dening pihak keluwarga temanten putri. Rangkaian adicaranipun :

1.        Kekalih temanten rawuh bebarengan kaliyan pangombyong (pengiring) saking griyanipun temanten putri. Para pangombyong menika biasanipun saking kluarga besar, tangga lan sedulur ingkang caket kaliyan temanten putri.

2.        Imbal Wicara, inggih menika dialog pasrahan temanten saking kluarga temanten putri dening kluarga besar temanten kakung.

3.        Kekalih temanten dipun paringi tirta suci 2 (kalih) cangkir ingkang dipun unjukaken dening kekalih tiyang sepuhipun temanten kakung kanthi gentenan.

4.        Sindur Binayang, inggih menika Bapanipun temanten kakung nyampiraken kain sindur wonten pundhakipun kekalih temanten lan nuntun pasangan menika wonten kursi pelaminan, Ibunipun temanten kakung wonten wingking ngiringi temanten sinambi nggujengi pundhakipun kekalih temanten.

5.         Sambutan dan ngaturaken matur nuwun saking wakil kluarga temanten kakung, sakmenika kekalih temanten kaliyan tiyang sepuhipun jumeneng jejer ing ngajeng pelaminan.

6.        Adicara paripurna.